Հայաստանի Բանկերի Միություն
Ընդունելություն-երեկույթ ՎԶԵԲ-ի շուրջ 30 երկրների 50-ից ավելի բանկերի 150 ներկայացուցիչների համար
Վերակառուցման և Զարգացման Եվրոպական Բանկի (ՎԶԵԲ) Երևանում կայանալիք տարեկան ժողովի և բիզնես ֆորումի նախօրեին Հայաստանի բանկերի միության նախաձեռնությամբ կայացավ ընդունելություն-երեկույթ Հայաստան այցելած միջազգային ֆինանսաբանկային կառույցների բարձրաստիճան պաշտոնյաների, ինչպես նաև Հայաստանի առևտրային բանկերի ղեկավարների, ՀՀ Կենտրոնական բանկի և միջազգային կազմակերպությունների բարձրաստիճան ներկայացուցիչների մասնակցությամբ։
Հայաստանի Բանկերի Միության նախագահ Դանիել Ազատյանի փոխանցմամբ՝ միջոցառումը նպատակ ունի մեկ հարկի տակ համախմբել ֆինանսական ոլորտի լավագույն մասնագետներին՝ մտքերի փոխանակման և փոխշահավետ նոր գործընկերական հարաբերություններ կառուցելու համար:
«Հայաստանյան բանկերի և բանկերի միության նախաձեռնությամբ այսօր մեկ հարկի տակ են հավաքվել բոլոր ֆինանսական կառույցների ղեկավարները, միջազգային կազմակերպությունների ներկայացուցիչները, շուրջ 30 երկրների, 50-ից ավելի բանկերի 150 մասնակիցներ: Մենք վստահ ենք, որ բացի աշխատանքային շփումներից, բանկային գործում կարևոր են նաև անձնական, գործընկերային շփումները, և այս միջոցառումը լավ առիթ է նման շփումների համար։
Վերջին տարիներին մենք առնչվում ենք այնպիսի բարդ խնդիրների հետ, ինչպիսիք են տարածաշրջանային ռիսկերը, միջազգային պատժամիջոցները, թվային փոխակերպումները և տրանսֆորմացիան, թվային ակտիվները, ЕSG-ն և այլն, որոնք ավելի շատ իրենց մեջ անորոշություններ են պարունակում, և մեր աշխատանքում մենք ստիպված ենք այդ փաստը՝ անորոշության ռիսկերը, հաշվի առնելով որոշումներ կայացնել։ Առաջիկա օրերին Երևանը դառնալու է վորենշյալ հարցերը ներկայացնելու և քննարկելու վայր, ինչն իհարկե ոգևորիչ է։ Ոլորտային քննարումներից բացի նախատեսում ենք մեր հյուրերին ծանոթացնել նաև հայկական հյուրընկալության կողմերին։ Փորձել ենք համադրել օգտակարը հաճելիի հետ»,-նշել է ՀԲՄ նախագահը։
ՎԶԵԲ-ի Հայաստան կատարած այցի շրջանակներում նախատեսվում են նաև երկկողմ հանդիպումներ միջազգային ֆինանսական կազմակերպությունների, օտարերկրյա բանկերի պատվիրակների և ներկայացուցիչների հետ՝ տարբեր ուղղություններով փոխշահավետ գործակցություն հաստատելու և ծավալելու ակնկալիքով։
Նշենք նաև, որ ՀԲՄ կողմից նախաձեռնված հանդիպումն իրականություն դարձավ Վիեննայում տեղակայված ՎԶԵԲ-ի Առևտրի խթանման ծրագրի պատասխանատուների, ԿԲ ու ՀԲՄ Եվրոպայում Հայաստանի Միջազգային ֆինանսական ինտեգրացիայի կենտրոնի շնորհիվ։
