Հայաստանի Բանկերի Միություն

  Հայաստանի բանկերի միության (ՀԲՄ) գործադիր տնօրեն Սեյրան Սարգսյանը մասնակցել է ՀՀ վարչապետի գլխավորությամբ Կառավարությունում տեղի ունեցած ՀՀ դատական և իրավական բարեփոխումների 2022-2026թթ․ռազմավարության և դրանից բխող գործողությունների ծրագրի կատարման  մշտադիտարկման խորհրդի նիստին, որի կազմում ՀԲՄ-ն ընդգրկվել է ՀՀ դատական և իրավական բարեփոխումների 2022-2026թթ․ ռազմավարության մեջ փոփոխություններ կատարելու Կառավարության որոշման համաձայն:

  Հանդիպման ընթացքում անդրադարձ է կատարվել դատական համակարգում բարեփոխումների ընդլայնմանը և մշակված օրենսդրական փաթեթներին, մասնավորապես՝ Քաղաքացիական և Վարչական իրավախախտումների վերաբերյալ օրենսդրության բարեփոխումներին, ինչպես նաև ներկայացվել են էլեկտրոնային արդարադատության ու էլեկտրոնային դատարան հարթակների միջոցով ծառայությունների մատուցման, e-draft հարթակի արդիականացման, էլեկտրոնային հաշտարարի համակարգի ուղղությամբ տարվող աշխատանքները:

  Անդրադարձ է կատարվել նաև դեռևս մայիս ամսին հիմնված Արբիտրաժի և հաշտարարության կենտրոնի և միջազգային մասնագետներից կազմված խորհրդատվական հանձնաժողովի գործունեությանը:

  Հանդիպման ընթացքում կարևորվել են իրականացված աշխատանքներն ու առաջիկայում նախատեսվող ծրագրերը և ընդգծվել դատաիրավական ոլորտում բովանդակային փոփոխությունների անհրաժեշտությունը:

  Քննարկման շրջանակում ՀԲՄ գործադիր տնօրենը ներկայացրել է դիտարկումներ և առաջարկներ ներկայացված ռազմավարության և գործողությունների ծրագրի կատարման հաշվետվության  վերաբերյալ:

Սկզբնաղբյուրը՝ ՀՀ Կառավարություն