Հայաստանի Բանկերի Միություն

  Անցյալ տարի առաջին ընթերցմամբ ընդունված Հարկային օրենսգրքում փոփոխություններ և լրացումներ նախատեսող օրենսդրական փաթեթի՝ բանկերում գրավադրված անշարժ գույքերին վերաբերող դրույթում կադաստրային արժեքների փոփոխության հետևանքով ի հայտ են եկել խնդիրներ` բանկերի համար առաջացնելով լրացուցիչ հարկային պարտավորություններ: Վերոնշյալ և «ՀՀ քաղաքացիական օրենսգրքում փոփոխություններ կատարելու մասին» օրենքների նախագծի փաթեթի վերաբերյալ երկրորդ ընթերցումից առաջ մի շարք հարցեր քննակելու նպատակով՝  հանդիպում-քննարկում էր կազմակերպել ԱԺ տնտեսական հարցերի մշտական հանձնաժողովը, որին մասնակցել են ԱԺ պատգամավորներ, ներկայացուցիչներ ֆինանսների նախարարությունից, Հայաստանի բանկերի միությունից և  ՀԲՄ անդամ առևտրային բանկերից:

  Ներկայացնելով օրենսդրական փաթեթով նախատեսվող փոփոխություններն ու լրացումները` ՀՀ ֆինանսների նախարարի տեղակալ Արման Պողոսյանը նշել է, որ առաջարկվում է անշարժ գույքի օտարման գործարքների ԱԱՀ և շահութահարկով հարկման բազաների նվազագույն կանոնների որոշմամբ` ընդհանուր մոտեցումից երկու դեպքերում բացառություն սահմանել բանկերի և վարկային կազմակերպությունների համար:

  Բանկերի ներկայացուցիչները ներկայացրել են դաշտում ստեղծված իրավիճակը` նշելով, որ անշարժ գույքի շուկայական արժեքն էականորեն տարբերվում է կադաստրային արժեքից: Ըստ նրանց` օրենքի նախագծերի փաթեթի ընդունմամբ կհստակեցվեն առկա անհարթությունները:

  Քննարկման ընթացքում անդրադարձ է կատարվել օտարման գործարքներին, առկա ռիսկերին և դրանց կառավարմանը:

  Բանկային ոլորտում առաջացած մի շարք այլ խնդիրների քննարկման նպատակով պայմանավորվածություն է ձեռք բերվել առաջիկայում կազմակերպել ևս մեկ աշխատանքային քննարկում:

Լուսանկարները՝ ՀՀ ԱԺ