Հայաստանի Բանկերի Միություն

Այսօր ՀՀ կենտրոնական բանկի, Հայաստանի բանկերի միության և «Իմ անտառ Հայաստան» ՀԿ միջև ստորագրվել է եռակողմ հուշագիր, որի շրջանակում ԿԲ և բոլոր առևտրային բանկերի ֆինանսավորմամբ երեք տարում կհիմնվի 100 հա նոր անտառ Լոռու մարզի Փամբակ համայնքի Լեռնաջուր բնակավայրի հողերում։ Ընդհանուր առմամբ, տնկվելու է 300,000 (երեք հարյուր հազար) տեղական անտառային տեսակի ծառ:

«Այս նախաձեռնությունը պարզապես ծառատունկ չէ․ այն արձագանք է մեր առջև ծառացած օրհասական բնապահպանական մարտահրավերներին։ Օդի աղտոտվածությունը, անտառային հրդեհների աճող ռիսկը, հողերի էրոզիան և անապատացման վտանգները այսօր դարձել են մեր երկրի, մեր տնտեսության և մեր համայնքների ամենօրյա մտահոգությունները։ Այս իրողությունները պահանջում են համակարգված և պատասխանատու քայլեր։ Համոզված եմ՝ այս աշխատանքը շարունակական է լինելու, և մեր համատեղ ջանքերը կերտելու են այն Հայաստանը, որը պարտավոր ենք թողնել հետագա սերունդներին», - նշել է  ՀՀ կենտրոնական բանկի նախագահ Մարտին Գալստյանը։

Այս համագործակցությունը  2023 թվականի ՀՀ դրամի 30-ամյակի առթիվ իրականացված նախագծի շարունակությունն է, երբ Հայաստանի բոլոր բանկերը և Կենտրոնական բանկը միասին տնկեցին 50 հեկտար անտառ Լոռու մարզի Ուրասար և Ջրաշեն բնակավայրերի մոտ։

 «Հավատարիմ մնալով կորպորատիվ սոցիալական պատասխանատվության մշակույթին (ԿՍՊ)՝ հայաստանյան բանկային համակարգը շարունակում է իր ներդրումն ունենալ ծրագրերում, որոնք ապահովում են երկարաժամկետ ազդեցություն և ստեղծում կայուն արժեք։ ՀԲՄ 30-ամյակի հոբելյանական տարում նոր անտառի հիմնման վերաբերյալ հուշագրի ստորագրումը դարձավ տարվա ամենահիշարժան նախաձեռնություններից մեկը՝ հերթական անգամ միավորելով ԿԲ-ին և բոլոր առևտրային բանկերին։ Ավելի քան 250 մլն դրամ արժողությամբ մեր համատեղ ծրագիրը վերահաստատում է նաև մեր պատրաստակամությունը շարունակական քայլերով աջակցել երկրի ավելի կանաչ ու կայուն ապագայի ձևավորմանը», - ընդգծել է Հայաստանի բանկերի միության նախագահ Դանիել Ազատյանը։

Անտառհիմնումն իրականացնելու է «Իմ անտառ Հայաստան» կազմակերպությունը համայնքային հողերում` նպատակ ունենալով ստեղծել կայուն, կենսաբազմազանությամբ հարուստ անտառներ։ Համայնքային հողի օգտագործման ժամկետի ավարտին այդ հողերը և դրանց վրա ձևավորված անտառային էկոհամակարգը վերադառնալու են համայնքին, և անտառը դառնալու է համայնքի սեփականությունը: «Իմ անտառ Հայաստան»-ն իրականացնելու է տնկված ծառերի հետագա խնամքը, դրանց պահպանությունը և անհրաժեշտության դեպքում չորացած ծառերի փոխարինումը նորերով:

 «Այս գործընկերությունը մեզ համար հատկապես արժեքավոր է։ Բանկերը, համատեղ գործելով, մասնակցում են ռազմավարական նշանակություն ունեցող նախագծի իրականացմանը։ Այս նախագծով նրանք ունեն մեծ ու փոքր տնտեսական դերակատարների մտածելակերպի վրա ազդելու ուժ։ Նոր անտառների հիմնումը երկարաժամկետ ներդրում է, որը կարևոր է մեր երկրի կայուն տնտեսական զարգացման համար», - նշել է «Իմ անտառ Հայաստան» հասարակական կազմակերպության հիմնադիր և տնօրեն Անտրէ Գումուշճեանը։