Հայաստանի Բանկերի Միություն
Միջազգային որակավորումների մուտքը Հայաստան. ՀԲՄ-ն և Եվրոպական ֆինանսական պլանավորման ասոցիացիան քննարկել են համագործակցության հնարավորությունները
Հունիսի 5-ից տեղի են ունեցել ՀԲՄ-ի հանդիպումները Եվրոպական ֆինանսական պլանավորման ասոցիացիայի (EFPA) նախագահ Էմանուել Կառլուչոյի և EFPA չափանիշների և որակավորման կոմիտեի նախագահ Պատրիկ Լեվանդորի հետ։ Քննարկման առանցքում ՀԲՄ-EFPA համագործակցության հնարավորություններն ու ուղղություններն էին, նաև ՀՀ ֆինանսաբանկային համակարգի աշխատակիցների միջազգային որակավորումը։
EFPA ղեկավար կազմը ներկայացրել է Եվրոպական ֆինանսական պլանավորման ասոցիացիայի միջազգային որակավորման գործընթացը, խոսել է թրեյնինգների և քննությունների կազմակերպման գործընթացից ու կանոնակարգից։
ՀԲՄ նախագահ Դանիել Ազատյանը հանդիպման ընթացքում նաև հակիրճ անդրադարձել է միության գործառույթների առանցքային կետերին՝ հղում անելով նոր գործարկված ուսումնական կենտրոնին։
Կողմերն ընդգծել են, որ ՀԲՄ-ի՝ EFPA-ի հայաստանյան ներկայացուցիչը դառնալը ֆինանսաբանկային ոլորտի մասնագետների համար միջազգային որակավորում ստանալու բացառիկ հնարավորություն է։
Այցի ընթացքում ՀԲՄ նախաձեռնությամբ EFPA նախագահը և EFPA չափանիշների և որակավորման կոմիտեի նախագահն առանձին հանդիպումներ են ունեցել ինչպես Հայաստանի առևտրային բանկերի տարբեր ստորաբաժանումների ղեկավարների, այնպես էլ ՀՀ Կենտրոնական բանկի ներկայացուցիչների հետ։
