Հայաստանի Բանկերի Միություն
Էթիկան բանկայի համակարգում և իրական հատվածում. առցանց քննարկում
Հայաստանի բանկերի միության և Բիզնեսի բարեվարքության ակումբի համատեղ կազմակերպված առցանց հանդիպմանը քննարկվեցին բանկային համակարգում և իրական հատվածում գործարար վարվելակերպի կանոնների կիրառման կարևորությանն ու հնարավորություններին վերաբերող մի շարք հարցեր։
ՀԲՄ գործադիր տնօրեն Սեյրան Սարգսյանը նշեց, որ բանկային գործը կառուցվում է էթիկական մշակույթի, մասնավորապես՝ վստահության հիմքերի վրա, իսկ վստահությունն ամրագրվում է բանկերում վարվելակերպի կանոններով և էթիկական սկզբունքներով՝ որպես բանկային մշակույթի առանցք:
«Բանկային գործարար վարվելակերպի կանոնագրքի նպատակն է ամրապնդել ու պահպանել բանկերի ու հաճախորդների միջև փոխադարձ վստահության ու հարգանքի մթնոլորտը, ամրապնդել միջբանկային առողջ հարաբերություները և խթանել ՀՀ բանկային համակարգում առողջ մրցակցային դաշտի բարելավմանը»,-նշեց ՀԲՄ գործադիր տնօրենը:
Քննարկման շրջանակում ՀԲՄ գործադիր տնօրենի տեղակալ Արման Սարգսյանը և միության վերլուծաբան Նելլի Այվազյանը ներկայացրեցին ՀԲՄ խորհրդի կողմից հաստատված Բանկային գործարար վարվելակերպի կանոնագրքի առանցքային սկզբունքները։ Բանախոսների փոխանցմամբ Կանոնագիրքն անդրադառնում է բարեվարքության կանոններին, բանկերի սոցիալապես պատասխանատու վարքագծին վերաբերող սկզբունքներին, առողջ ու բարեխիղճ մրցակցություն ապահովելու էթիկական նորմերին:
Էթիկայի սկզբունքներով գործող հաճախորդ գործընկերներին, այդ թվում՝ ՓՄՁ-ներին ընձեռնվող առավելություններից ՀԲՄ գործադիր տնօրենը մասնավորապես առանձնացրեց ֆինանսական միջոցների և ծառայությունների լայն շրջանակի հասանելիության, առավել բարենպաստ պայմաններով վարկավորման, ավելի բարդ ֆինանսական գործիքակազմից օգտվելու հնարավորությունը:
Կորպորատիվ կառավարման կենտրոնի տնօրեն Նարինե Մելիքյանն իր հերթին ներկայացրեց կորպորատիվ կառավարման առանձնահատկությունները ՓՄՁ-ներում՝ ընդգծելով բարեվարքության մշակույթի ինտեգրման հնարավորությունները, ինչպես նաև Կոլեկտիվ նախաձեռնությունների դերը:
Նմանատիպ նորություններ
ԱՐԱՐԱՏԲԱՆԿ ԲԲԸ-ի հերթական տարեկան ժողովին մասնակցեց «Հայաստանի բանկերի միության նախագահ Դանիել Ազատյանը։
«Հայաստանի բանկերի միություն»-ը և «Հայաստանի Օքսֆորդի շրջանավարտների բիզնես ակումբ»-ը ստորագրել են համագործակցության հուշագիր, որով ամրապնդել են ֆինանսաբանկային ոլորտում առաջընթացի նոր ծրագրեր իրականացնելու հեռանկարը։
Բանկային և կառուցապատման ոլորտի ներկայացուցիչների մասնակցությամբ այսօր տեղի ունեցավ «Հայաստանի բանկերի միության» և «Միջազգային ֆինանսական կորպորացիայի» համագործակցությամբ կազմակերպված «Կայուն հորիզոններ. ուրվագծելով Հայաստանում կանաչ կառուցապատման ներդրումների ապագան» միջոցառումը։
