Հայաստանի Բանկերի Միություն
Առևտրային բանկերի աջակցությունը հաշմանդամություն ունեցող անձանց սոցիալ-հոգեբանական ծառայությունների կենտրոնին
Հունիսի 1-ի՝ երեխաների պաշտպանության միջազգային օրվա նախօրեին, Հայաստանի բանկերի միությունը հյուրընկալվեց «Լիարժեք կյանք» հասարակական կազմակերպությունում։
Արդեն 24 տարի «Լիարժեք կյանք» հասարակական կազմակերպությունը Երևանում և Հայաստանի 3 մարզերում գործող կենտրոններում առանց տարիքային սահմանափակման վերականգնողական, սոցիալ-հոգեբանական, իրավախորհրդատվական և մասնագիտական կարողությունների զարգացման ծառայություններ է մատուցում շուրջ 1700 տեղաշարժման, տեսողության և մտավոր զարգացման խանգարումներ ունեցող անձանց:
Նպատակ ունենալով բարելավել Երևանի կենտրոնի շենքային պայմանները՝ դեռևս ամիսներ առաջ կազմակերպությունը նախաձեռնել էր կապիտալ վերանորոգման աշխատանքներ: Ծանոթանալով կենտրոնի գործունեությանը՝ Հայաստանի բանկերի միությունը, ի դեմս ՀՀ-ում գործող առևտրային բանկերի, որոշում կայացրեց ներդրում ունենալ հաշմանդամություն ունեցող անձանց աջակցող կենտրոնի վերանորոգման աշխատանքներին՝ նվիրաբերելով անհրաժեշտ քանակի օդորակիչներ։
Ինչպես նշում է ՀԿ նախագահ Սուրեն Մաղաքյանը՝ իրենց կենտրոնների երկարամյա և արդյունավետ գործունեության երաշխավորները կազմակերպության բարեկամը դարձած այն աջակիցներն են, ովքեր աջակցում են հաշմանդամություն ունեցող անձանց սոցիալական ներառմանը:
«Ներկայում կենտրոնի տարածքը հնարավորինս հարմարեցված է տեղաշարժման և տեսողության խնդիրներ ունեցող անձանց անվտանգ տեղաշարժման համար, սակայն շահառուների հետ լիարժեք աշխատելու համար անհրաժեշտ են նաև շենքային հատուկ պայմաններ։ Այս հարցում մեր խնդրանքին արձագանքեց Հայաստանի բանկերի միությունը և բանկերի աջակցության շնորհիվ մեր վերակառուցվող կենտրոնն արդեն ապահովված է օդորակիչների անհրաժեշտ քանակով»,-նշեց «Լիարժեք կյանք» ՀԿ նախագահ Սուրեն Մաղաքյանը:
Ծանոթանալով կենտրոնի գործունեությանը՝ Հայաստանի բանկերի միության գործադիր տնօրեն Սեյրան Սարգսյանը կարևորեց վերջինիս դերը հաշմանդամություն ունեցող անձանց կյանքի համար հնարավորինս լիարժեք պայմաններ ապահովելու հարցում։
«Երկու տասնամյակից ավելի այս կենտրոնն օգնության ձեռք է մեկնում հասարակության առավել խոցելի անձանց։ Անգնահատելի է մասնավորապես կենտրոնի շահառու մանկահասակ երեխաների հետ տարվող աշխատանքը, ովքեր կենտրոնի մասնագետների հոգատար և ճիշտ մոտեցման արդյունքում կարողնաում են հնարավորինս լիարժեք հաղորդակցվել շրջապատի հետ։ Առևտրային բանկերը մշտապես իրականացնում են աջակցության տարբեր ծրագրերը և ուրախ եմ, որ այս անգամ ևս կարողացանք օգտակար լինել և աջակցել շատերի համար երկրորդ ընտանիք դարձած այս կենտրոնին»,-նշեց Սեյրան Սարգսյանը։
«Լիարժեք կյանք» ՀԿ կատարած ՀԲՄ այցի շրջանակում կենտրոնի երեխաների համար կազմակերպվեց նաև ուրախ ժամանցային ծրագիր։
ՀԲՄ հասարակայնության հետ կապերի ծառայություն
Նմանատիպ նորություններ
Սեպտեմբերի 13-ին ՀՀ կենտրոնական բանկի, Հայաստանի բանկերի միության , ՀՀ առևտրային բանկերի, Լոռու մարզպետարանի և «Իմ անտառ Հայաստան» բնապահպանական կազմակերպության ներկայացուցիչները այցելեցին հայկական դրամի 30-ամյակի առթիվ հիմնված անտառային տնկարկներ Լոռու մարզի Ջրաշեն և Ուրասար համայքներում:
«Հայաստանի բանկերի միության» նախագահ Դանիել Ազատյանը հունիսի 21-ին մասնակցեց «Հայէկոնոմբանկ» ԲԲԸ բաժնետերերի տարեկան ժողովին։
Շնորհավորելով «Հայէկոնոմբանկ»-ի բաժնետերերին և ղեկավարությանը՝ Դանիել Ազատյանը շեշտեց, որ ընկերությունը տարիների ընթացքում ցույց է տվել իր կայուն դիրքը բանկային համակարգում՝ լինելով պահպանողական, բայց հետ չընկնելով նորարարություններից։ «Բանկի հաջողության գրավականներից մեկը նաև ճիշտ կադրեր ընտրելու քաղաքականությունն է»,-նշեց Հայաստանի բանկերի միության նախագահը։
