Հայաստանի Բանկերի Միություն
Կայացել է Հայաստանի բանկերի միության տարեկան ընդհանուր ժողովը
2019 թվականի հունիսի 19-ին տեղի է ունեցել Հայաստանի բանկերի միության տարեկան ընդհանուր ժողովը, որը վարել է միության նախագահ Ա. Հանեսյանը:
Միության կանոնադրությամբ սահմանված ամենամյա հերթական ժողովի օրակարգում ընդգրկված հիմնական հարցերի շրջանակներում ՀԲՄ գործադիր տնօրեն Ս. Սարգսյանը հաշվետվություն է ներկայացրել 2018 թվականի ֆինանսական և ընթացիկ գործունեության վերաբերյալ:
Գործադիր տնօրենի կողմից տրամադրված տեղեկատվության համաձայն 2018 թվականի տարեկան ծրագրի շրջանակներում Հայաստանի բանկերի միությունը աշխատանքներ է ծավալել մի շարք ուղղություններով, որոնցից հատկապես առանձնացվել են՝ բանկային գործունեության կարգավորմանն ուղղված նախաձեռնությունները, բանկերին վերաբերող խնդիրների լուծման ուղղությամբ տարվող աշխատանքները, միջազգային փորձի ուսումնասիրությունները և վերջիններիս հիման վրա վերլուծությունների կատարումը, միջազգային կառույցների հետ համագործակցությունը, պետական, մասնավոր, հասարակական ամենատարբեր կազմակերպությունների և լրատվամիջոցների հետ շփումները, ներգրավվածությունը ոլորտի բարելավմանն ուղղված մի շարք հանձնաժողովներում, ինչպես նաև միության բնականոն գործունեության ապահովմանը միտված գործընթացները:
Մանրամասնություններ են ներկայացվել հիշյալ ուղղություններում Հայաստանի բանկերի միության անմիջական նախաձեռնությամբ կամ մասնակցությամբ տեղի ունեցած բոլոր միջոցառումների, քննարկումների, հանդիպումների, սեմինարների և տարաբնույթ այլ ձևաչափերով իրականացված աշխատանքների վերաբերյալ:
Այնուհետև Հայաստանի բանկերի միության գործադիր տնօրեն Ս. Սարգսյանը պատասխանել է միության խորհրդի անդամների կողմից բարձրացված հարցերին ու անդրադարձ կատարել նաև նախորդ տարվա գործունեության արդյունքների հիման վրա մշակված և ընթացիկ տարում նախատեսված ծրագրերի ռազմավարական ուղղություններին:
Հավելենք, որ առաջիկայի ռազմավարական ծրագրերում ներառված են միության շարունակական արդիականացման, գործառույթների հնարավոր թվայնացման, ինչպես նաև հասարակայնության հետ կապերի ասպարեզում նորովի մոտեցումների մշակման ու իրագործման գերակայությունները:
Հաշվետու ժողովի ավարտին, սահմանված կարգի համաձայն, տեղի է ունեցել նաև Հայաստանի բանկերի միության վերստուգիչ հանձնաժողովի անդամների ընտրություն:
Հայաստանի բանկերի միության
հասարակայնության հետ կապերի ծառայություն
